Sarakuru urku chakipi shuk uchilla kucha tiyan. Yuyak runakunaka rimankunami ñawpa pachapi kay uchilla kucha piñak kashka. Runakunaka chay kuchata mana yallinata yacharkakunachu; yallikpika kay kucha runata mikunkapak katinatashi yacharka.

Runakuna ama kucha katinchunka, mana samashpa yallinata charirkakuna.

Kay kucha sumak warmikunatashi munak karka; paykunatashi hapinata yacharka paypak warmi tukuchun. Chay raykushi kuytsakuna llamakunata michinkapak mana llukshinata yacharkakunachu.

Shuk punchaka shuk sumak warmishi yallikurka, kucha katishpa hapishkashi; hapishpaka paytaka apashkashi paypak wasiman. Kayka shina wasishi kashka: hatun sumaymana punkukunawan; kay punkukunaka kurimanta rurashka kashkashi; tukuy charinakuna kullkimanta rurashkashi kashka, mana kullkimanta kashpaka kurimantashi kashka.

Kay warmitashi:

— Ni kaypi kawsakrikpi, tukuy ñukapak kashkakunata kanman kusha nishkashi.

Kay warmi manchaymantashi:

— Ari, sakirishami, nishka.

Chashna nikpi, payman shuk sumak kuri wallkatashi churachirka.

Chayta churarishka kay warmika upalla llukshishka.

— Ñuka wasiman rinkapakshi, yuyarin.

Payka shuyashka kucha puñunkakaman, puñukpishi llukshishka, paypak wasiman rishka, taytakunaman wakashpashi willan.

Kay rimaymantaka chayllatami yuyarini, ashtawan mana yachanichu.